Wis 2

Tingting bilong ol manmeri nogut

1 Ol manmeri nogut i longlong na ol i ting olsem, laip bilong yumi i sotpela na ol kain kain wari tasol i save pulap long en. Yumi olgeta i mas i dai. I no gat rot bilong abrusim i dai. Yumi no bin harim yet long wanpela man o meri i bin kam bek long ples bilong ol man i dai pinis. 2 Yumi kamap nating tasol. Laip bilong yumi i no gat as bilong en. Na taim yumi dai pinis, em i wankain olsem yumi no bin kamap. Laip bilong yumi i olsem smok i save kamap long paia. Em i save stap liklik taim tasol na em i pinis olgeta. Na tingting bilong yumi i olsem liklik paia i save dai kwik. Taim yumi no pulim win moa, orait dispela liklik paia bai i dai, na bodi bilong yumi tu bai i pinis na kamap olsem sit bilong paia tasol. 4 I no longtaim na ol manmeri bai i no tingim moa ol samting yumi bin mekim. Bai ol i lusim tingting olgeta long nem bilong yumi. Laip bilong yumi bai i pinis olgeta olsem sno na klaut bilong moning. San i boinim, na em i lus olgeta. 5 Taim bilong yumi hia long graun i olsem win i kam na wantu tasol i go pinis. Yumi no inap ranawe long i dai. Nogat. Yumi olgeta wan wan i gat de stret bilong yumi mas i dai. Na i no gat wanpela bilong yumi inap long surikim dispela de i go bek.

6 Sampela ^a bai i tok olsem, “Sapos laip em i olsem, orait maski wari. Yumi bihainim pasin bilong ol yangpela na yumi go pinisim laik bilong yumi long olgeta samting. 7 Yumi dringim planti gutpela wain na putim sanda i dia tumas. Yumi no ken larim ol naispela plaua i dai nating. Nogat. Yumi kisim ol na bilasim gras bilong yumi. 9 Yumi olgeta kam bung na wokim pati na mekim save tru. Yumi raun raun na olgeta man i ken lukim amamas bilong yumi. Dispela kain pasin i samting tru na i swit moa.

10 “Yumi go krungutim ol rabis-manmeri, maski ol i gutpela, o nogat. Maski sori long ol meri, man bilong ol i dai pinis. Na maski long ol lapun na ol waitgras. 11 Yumi gat strong. Olsem na yumi wokim lo bilong yumi yet, na yumi pinisim laik bilong yumi. Ol manmeri i no gat strong, ol i samting nating. 12 Yumi painim rot bilong bagarapim ol manmeri i save bihainim stretpela pasin. Long wanem, ol i pasim rot bilong yumi. Ol i kros long pasin bilong yumi na ol i tok, yumi save kalapim lo bilong Moses na pasin bilong ol tumbuna. 13 Ol i tok olsem, ol i save gut long God na ol i pikinini bilong God. 14 Pasin bilong ol i birua tru long olgeta pasin na tingting bilong yumi. Yumi les tru long lukim dispela kain manmeri. 15 Ol i no olsem ol arapela manmeri. Nogat. Pasin bilong ol i narakain tru. 16 Ol i ting, pasin bilong yumi i doti olgeta, na ol i save stap longwe long yumi. Ol i tok, ol manmeri i mekim gutpela pasin bai i kisim amamas bihain. Na ol i mauswara na tok, God em i Papa bilong ol.

17 “Tasol yu wet. Bai yumi lukim, tok bilong ol i tru, o nogat? Wanem samting tru bai i kamap long ol long taim bihain? 18 Sapos i tru ol stretpela manmeri ol i pikinini bilong God, orait God yet bai i sambai long ol na kisim bek ol long han bilong ol birua. 19 Goan, yumi givim pen long ol, bilong traim ol. Ol bai inap karim hamas pen? Ol bai inap i stap bel isi, o nogat? 20 Orait yumi pasim tok nau. Yumi semim ol long ai bilong ol manmeri na kilim ol i dai. Ol i no ken pret, long wanem, ol yet i tok, God bai i lukautim ol.”

21 Em tasol tingting ol manmeri nogut i save autim. Tasol ol i longlong tru. Pasin nogut bilong ol i paulim pinis tingting bilong ol. 22 Ol i no bilip olsem, God bai i givim gutpela pe long ol man i save bihainim stretpela pasin. Ol i no save liklik long as tingting bilong God. 23 Tingting ^b bilong ol i paul tru. As tingting bilong God i olsem. Em i no laik bai ol manmeri i dai. Long wanem, em yet i save stap oltaim na em i wokim ol manmeri olsem em yet. 24 Tasol Satan i mangalim ol manmeri, na dispela em i as bilong i dai i kamap long graun. Na ol manmeri bilong lain bilong Satan, ol bai i dai, na i lus olgeta.